Program
Ontdekkers
Voorskool Lede
Tyd Vir Pret
Vir pret, vriendskap en aktiwiteite wat jou laat dink sowel as doen.
(Nie die amptelike embleem nie)
Penkoppe & Drawwerjies
6 - 13jr. / Gr. R - 7
Ons Gaan Vorentoe
Sluit aan by die pret en neem aan soveel avontuur deel as wat jy kan hanteer!
Verkenners
14 - 17 jr. / Gr. 8 - 11
Verken Alles
Vind uit wie jy is en waartoe jy instaat is van vlotvaarte, bergklim tot die uitdaging om 'n Jong Leier te word.
Staatmakers
18 - 28 jr.
Avontuur Wag Vir Jou
Lus vir 'n nuwe avontuur ?
Wil jy 'n verskil maak ?
Probeer dan Die Voortrekkers se Staatmaker program. Dit is vir jong volwassenes wat bo die gewonde wil gaan en uitvind wie hulle werklik is. Van ekspedisies to hulp aan plaaslike gemeentskapprojekte, ons doe dit alles.
'n Inligtingstuk vir Ouers
Gun jou kind 'n beter kans
Die Voortekkers se Programme
Die Voortrekker ervaring word volgens ouderdom en aktiwiteite in vyf programme verdeel. Ontdek watter programme vir jou beskikbaar is deur die relevante ouderdom te kies:
Wat is Die Voortrekker-program?
Die Voortrekkers is vir seuns en dogters, kleuterskool tot naskool. Die Voortrekkers is die tradisionele Voortrekkers program vir seuns en dogters. Dit is een van die oudste jeugorganisasies in die Suid-Afrika, waar jongmense kan deelneem aan verskeie buitemuurse aktiwiteite soos kampeer, stap, boere-sport, bergfietsry, en nog baie meer! Dit is 'n program waar die jeug die grondslag vir leierskap, burgerskap en persoonlike fiksheid ontwikkel deur prettige aktiwiteite waarby ouers en wettige voogde betrokke is. Ideaal gesproke word spanne volgens graad georganiseer.
By Die Voortrekkers poog ons om jongmense te leer oor:
- Karakterontwikkeling
- Burgerskap opleiding
- Leierskap
- Geestelike en fisiese fiksheid
Wat sal ek in Die Voortrekkers doen?
Die aktiwiteite is ontwerp vir Die Voortrekker-gesinne om deel te neem aan die pret, en sluit in om die buitelewe te verken, bouprojekte, vriende te maak en 'n lewenslange liefde vir leer te ontwikkel.
Penkoppe & Drawwertjies en die Verkenners doen baie aktiwiteite, insluitend maar nie beperk nie tot:
- Kampeer
- Stap
- Verken Stokperdjies
- Kanovaart
- Buitelug kook
- Gemeenskapdiensprojekte
Afrikanerskap
Burgerskap
Christenskap
Diensbaarheid
Die storie van Die Voortrekkers is ’n verhaal van vrywilligers wat hul vrye tyd gebruik om graadwielboeke, handleidings en ander literatuur te skryf. Geboue, spankamers en kampterreine het deur harde werk en innoverende denke ontwikkel tot spogprodukte.
Dit is ’n storie van sente omdraai, moue oprol, vasbyt en hard werk. Dit is ’n storie van historiese feeste, monumente bou en erfenisse bewaar. Dit is ’n storie van betrokkenheid, praktiese omgee en diensbaarheid in plaaslike gemeenskappe.
Die Voortrekkerstorie vertel ’n verhaal van planne, vars denke, aanpasbaarheid en hoëfunksieprestasies. Dit is ’n storie van liefde vir Afrikaans, Afrikanerkultuur, Afrikanerkinders, maar bo alles, vir die Here.
Ook is dit ’n storie van pret, kameraadskap en avontuur.
Dit is geen wonder dat Die Voortrekkers oor dekades heen gegroei het tot ’n lewenskragtige, en saakmakende kultuurorganisasie nie.
Getrou aan die oorspronklike stigtingsideale van NJ van der Merwe, Vader Visser en Japie Heese is Die Voortrekkers vandag steeds ’n toekomsgerigte jeugorganisasie wat:
# Afrikanerkinders se karakter deur Bybels-Christelike waardes vorm.
# Afrikanerkinders die geleentheid bied om hul kultuur in die natuur deur avontuur te geniet.
# Afrikaners begelei om as oortuigde Christene nie net Bybelse waardes in hul persoonlike lewens uit te leef nie, maar ook om gemeenskapswaardes deur middel van diens, deelname en standpunte te help vorm.
# Afrikanerkinders help om lewensvaardighede te ontwikkel om as uitnemende en diensbare leiers ’n betekenisvolle en positiewe bydrae te lewer tot die land en die kontinent.
# Afrikanerkinders ’n tuiste bied waarin hulle Afrikaners se geskiedenis, taal, kultuur en tradisies ten volle kan uitleef en geniet.
Hierdie ideale het oor dekades neerslag gevind in die wese, waardes en strategiese doelwitte van Die Voortrekkers om jong Afrikaners as uitnemende leiers te ontwikkel.
Boublokke van die Voortrekkers
Geloof
Die Bybel is ons grondslag. ’n Voortrekker glo in die Drie-Enige God en dien Hom.
Trots
Ons naam, Die Voortrekkers, definieer ons. Daarin lê eeue-oue kulturele kapitaal, Afrikaneridentiteit en tradisies opgesluit. Ons is trots op wie ons is en daarom neem Die Voortrekkers ook mede-verantwoordelikheid om ons taal, Afrikaans Afrikanerkultuur en ons geskiedenis met trots te bevorder.
Span
Voortrekkerwerk is spanwerk. By Die Voortrekkers leer jeuglede om deur middel van spanleierskap en saamwerk gemeenskaplike doelwitte te bereik. Deur spanwerk word jeuglede se karakter as ABCD-mense gevorm.
KAN (Kultuur, Avontuur en Natuur)
Die kombinasie en balans tussen kultuur, avontuur en natuur is Die Voortrekkers se geheime resep vir jeugontwikkeling. Die eerste letters van die woorde spel KAN. Voortrekkers is nie Voortrekkers as een van die KAN-boustene ontbreek nie. Waar dit in balans gebring word, KAN ons ’n verskil maak aan ’n kind se lewe. In Die Voortrekkers ontdek elke kind hulle KAN.
Die Voortrekkers bied jaarliks tydens skoolvakansies veertig veld-, see-, water- en woestynkampe op provinsiale grondslag regoor Suid-Afrika en Namibië aan. Dan is daar boonop ’n magdom spankampe, plaaslike kommandokampe, oordkampe en Voortrekkertoere wat deurlopend aangebied word van die Caprivi tot Seepunt. Op Voortrekkerkampe word kultuur en avontuur in die natuur op ’n unieke wyse ervaar.
VAT (Vaardighede, Antwoorde & Toepassing)
Deur die ontwikkeling van selfdoen-Vaardighede, waardegedrewe Antwoorde en praktiese Toepassing VAT Die Voortrekkers die toekoms met selfvertroue.
Selfdoenvaardighede word ontwikkel deur 92 laerskool- en 123 hoërskoolkentekens wat aangebied word in spanverband, spesiale geleenthede en kampe.
Met die Bybel as grondslag en aan die hand van die Voortrekkerkode dink Die Voortrekkers saam oor aktuele vraagstukke en ontwikkel positiewe waardegedrewe antwoorde.
Die Voortrekkers leer jeuglede om Bybelse waardes en selfdoenvaardighede in hulle konteks prakties toe te pas deur hulle gemeenskap positief te beïnvloed.
Diens
Diensbaarheid is die asem van Die Voortrekkers. Sonder ’n gesindheid van diensbaarheid is ’n gemeenskap se kultuurlewe dood. Om die rede is elke Voortrekkerbelofte ’n belofte van diensbaarheid.
Die Voortrekkerkode word verwerklik deur diensbaarheid. In die eerste kode sê Voortrekkers ons dien die Here. Die tiende kode sê ons Voortrekkers leef diensgerig en diensvaardig. Die eerste en die tiende kode omsluit Die Voortrekkers se etos van moderne Afrikanerskap, positiewe Burgerskap en konsekwente Christenskap. Diensbaarheid behoort tot die wese van Voortrekkerwees. Die Voortrekkers bied ’n ruimte waar lede diensbaar kan wees aan die Here, ons land, ons kinders en ons gemeenskap.
Leierskapsontwikkeling
Die Voortrekkers verstaan nie leierskap as posisies, range of titels nie. Elkeen wat verantwoordelikheid vir hom- of haarself en vir ander aanvaar, is in Die Voortrekkers ’n leier.
Die Voortrekkers begelei jeuglede om hulle volle leierskappotensiaal te verwerklik deur ’n gesindheid van diensbaarheid. Die Voortrekkers begelei ons jeuglede om verantwoordelikheid te aanvaar vir hulle eie toekoms, maar ook medeverantwoordelikheid vir hulle gemeenskap en omgewing.
Die Voortrekkers het vier omvattende leierskapsontwikkelingsprogramme vir laerskool-, hoërskool-, naskoolse en volwasselede. Na suksesvolle voltooiing van elke fase word nasionale erkenning op laerskool gegee deur middel van die Voorslagtoekenning en op hoërskool deur die Presidentsverkennertoekenning in kulturele leierskap.
Die Voortrekkers is ’n geakkrediteerde opleidingsinstelling wat verskeie SETA-geakkrediteerde kursusse, toerustingskursusse en persoonlike verrykingsgeleenthede vir naskoolse jongmense en volwasse lede aanbied.
Prestasie
Voortrekkers is voorposmense. As eietydse pioniers trap ons nuwe spore, dui nuwe koers aan – grensverskuiwend, saakmakend en rigtinggewend. Voortrekkers stagneer nie, maar streef na uitnemendheid in alle opsigte. Middelmatigheid en tweede beste is nie vir Die Voortrekkers ’n opsie nie. Met min sente en baie kreatiwiteit het Die Voortrekkers altyd ’n plan om ’n uitnemende geleentheid aan te bied. Die les uit ons verlede is: Prestasie skep toekoms.
Familiehuis
Die Voortrekkers is ’n gesellige familiehuis met baie kamers. In die huis word vriende vinnig soos familie. Die Voortrekkers bied ’n behoortruimte waar oupa en ouma, pa en ma saam met hulle kinders in ’n gebalanseerde kultuuromgewing saam kuier, saam dien en saam kultuur met avontuur in die natuur geniet.